Udalak eta Jai Batzordeak egitarau zabala prestatu dute maiatzaren 11tik 19ra bitartera garatuko dena. Udalerriko hogeita hamar elkarte inguruk parte hartuko dute jardueren antolaketan.
Musika emanaldiak, familientzako tailerrak eta jolasak, kirol jardunaldiak, kalejirak, paella lehiaketa edo bazkari herrikoia eta elikadura eta artisautza azoka tradizionala dira aurten diseinatutako 35 jardueren artean nabarmentzen diren hitzorduetako batzuk.
2024ko San Isidro jaiak nobedadez gainezka datoz. Ospakizunen egitarauak derioztarren parte-hartze aktiboa izan du. Izan ere, azken hilabeteetan topaketa parte-hartzaile desberdinak antolatu dira Udaleko eta Jai Batzordeko ordezkarien eta udalerriko elkarte, klub, erakunde eta bizilagunen artean, programa zabala eta askotarikoa prestatzeko, publiko guztien sentsibilitate, lehentasun eta gustuei adi.
“Topaketa hauekin herritarrak inplikatu nahi izan ditugu jai-programa oparo bat egituratzeko, derioztarren gustu eta iritzi guztiei erantzungo diena. Prozesu aberasgarria izan da, klubak eta elkarteak inplikatu egin dira, ideia asko eman dituzte, energiaz gainezka parte hartu dute. Kudeaketa eredu bat da, auzotarrengandik gero eta gertuago egoteko eta esparru edo eremu desberdinetara eramango duguna”, adierazi du Esther Apraiz herriko alkateak.
Horrela, San Isidroren omenezko jaiak bi asteburutara zabalduko dira lehen aldiz. Lehenengo asteburua maiatzaren 11 eta 12koa izango da, eta kultur eta kirol elkarte eta taldeek antolatutako ekitaldiez gozatzeko aukera eskainiko da. Asteburu honek erakunde hauek urte osoan zehar egiten duten ezinbesteko lana ikusarazteko eta balioesteko balioko du. Eta bigarren asteburua, 17tik 19ra, “ohikoa” izango da, kontzertuekin eta herri bazkariarekin,
besteak beste. Maiatzaren 15a ahaztu gabe, etxeko txikienei zuzendutako egitarau berezia izango duena. Programa oso hau egiteko udalerriko 29 elkartek parte hartu dute.
Herritarren parte-hartze nabarmenaz gain (antolatutako 35 ekitaldietatik 17tan zuzenean parte hartu dute), aurten musika-programazio zabal baten aldeko apustua ere egiten da. Lau musika-gune jarriko dira udalerriko beste horrenbeste tokitan. Bakearen plazan, Urkiola aparkalekuan, Sollube kalean eta Gaztelumendi plazan hainbat musika estilo uztartuko dituzten DJak set txikiak jarriko dira, rocka, euskal musika, 80ko eta 90eko arrakastak… Agertoki nagusian, rantxerak, rapa, dub-a, elektro-latinoa, erromeria eta punk-rockaz gozatu ahal izango da, baita DJ saioez ere. Derio eta Txorierrikoak zein eskualdeaz haraindikoak izango dira.
Herritarren parte-hartzea
Maiatzaren 11n, larunbata, 11:00etatik 15:00etara, 25 postu desberdinez osatutako herri azoka izango da kantxa estalietan eta inguruetan. Bertan erakusketak, tailerrak, artisautza azoka eta taloa egongo dira Derioko kultur elkarte desberdinen eskutik, hori guztia Hiruga folklore taldearekin girotuta. Goiz horretan bertan, Emaus Gizarte Fundazioa – Pai Bitartean, Ampa Txiki, Gure Señeak eta Koxak Talde Feministak informazio standakizango dituzte, Txakurlagunak elkarteak erreskate-txakurren erakustaldia egingo du, Marrazten taldeak herriko adinekoei egindako erretratuen erakusketa bat egingo du, Marikobaso Espazioa arduratuko da Aiartza basoarekin lotutako argazki batzuk erakusteaz, Eltzegintza Elkarteak urte osoan egindako lana erakutsiko du, DATek (Derioko Argazki Taldea) argazki-estudio bat muntatuko du Kultur Birikan, Tximintx Euskara Elkartea taloak egiten ariko da eta Jai Batzordeak pilotalekuko txosna irekiko du. Halaber, goizean goizetik, Atxiki Pelota Elkarteak antolaturiko frontenis txapelketa jokatuko da frontoian. Arratsaldean, 19:00etatik aurrera eta elizako plazatik abiatuta, Piperdun, Kukudatza eta Lainomendi dantza taldeek kalejira dantzagarria egingo dute Derioko kaleetan zehar.
Hurrengo egunean, maiatzaren 12an, kirol elkarteen eta taldeen txanda izango da. Untza Mendi Taldeak XXXVI. mendi-martxa ospatuko du: udaletxeko plazatik hasita, 8:00etan helduentzat eta 9:00etan haurrentzat. Ondoren, 11:00etatik 14:00etara, kirol azoka izango dugu kiroldegiko pistan: Pozgarri Futbol Sala, Miragarri Dance, CD Derio, Txorierri Basketland Sk, Taekwondo Doyan eta Derio Kick-Boxingek hainbat joko eta klase prestatu dituzte, mundu guztiak parte har dezan eta Derion egiten diren kirolak ezagutzera emateko. Kantxa estalietan herri-kirolak ezagutzeko aukera ere izango dugu. Egun horretan ere pilotalekuko txosna irekiko da. Lehen asteburuari amaiera emateko, 18:00etan, Lainomendiren urteroko erakustaldiaz gozatzeko tartea izango da udaletxeko plazan (euria egiten badu, frontoira pasako da).
Paella txapelketa
Bigarren asteburuak tradizionalaren antz handiagoa izango du, baina nobedadeak ere baditu. Adibidez, maiatzaren 18ko herri bazkaria paella lehiaketa bihurtuko da. Paellen izen-ematea 12:00etatik 14:00etara izango da jai batzordearen txosnan, eta 14:00etatik 14:30era bitartean aurkeztu beharko dira. Herri-bazkaria 15:00etan izango da txosnagunean, eta txapelketan parte hartu nahi ez duena ere gonbidatuta egongo da norberak ekarritako janari eta tresneriarekin etortzeko. 2€-ren truke aulkia eta mahaia erreserbatu ahal izango dira, eta tiketak ZUTOIA, SUGOI BYRON eta ADARVE tabernetan egongo dira salgai maiatzaren 3tik 12ra (biak barne). Aforoa mugatua izango da.
Bazkalostea Julen Axpek girotuko du Furgonologo bakarrizketarekin (euskaraz eta gaztelaniaz), eta ostean, paellen sari-banaketa egingo da (1. Saria: 150 euro + 2 txakolin botila; 2. Saria: 100 euro + 2 txakolin botila; 3. Saria: 50 euro + 2 txakolin botila). Arratsaldearekin jarraitzeko, 19:00etatik aurrera, herriko gazte talde batek antolatutako kuadrilla txapelketa martxan jarriko da txosnagunean hasita tabernetan zehar. Helduenen gozamenarako txitxarrilloak ere izango dira.
Arratsaldean, 19:30ak eta 21:30ak bitartean, herriko 4 gune girotuko dira, hainbat generotako musika-saioekin, arratsaldez eta beste leku batzuetan musika faltan sumatzen zuten herritarren proposamenei erantzuteko.
Maiatzaren 19an, igandea, jaiei amaiera bikaina emateko, elikadura eta artisautza azokaegingo da goizean, eta arratsaldean, Piperdun eta Kukudantzaren dantza erakustaldiaz, txokolatadaz eta azken trakaz gozatzeko aukera izango da.
Txikienek aste osoan zehar izango dituzte ekintzak, baina maiatzaren 15ean izango dira euren gustu eta gurarei bereziki zuzendutakoak. Goizean era askotako tailerrez gozatuko dute, jolasak egongo dira, baita marrazki-lehiaketa bat ere, dagokion sari-banaketa izango duena. Jardunaldia arratsaldez biribilduko da diskofesta batekin, 17:00etatik 20:00etara.
“Bistan da egitarau zabala eta askotarikoa duten jaiak direla. Ziur derioztarrek eta bisitatzen gaituztenek une ederrez gozatuko dutela. Ilusio handiz prestatu ditugun egunak dira”, amaitu du alkateak.
