- Ekainaren 3tik 28ra, 7 urtetik gorako derioztarrek beren ekarpenak egiteko aukera izango dute 2025eko udal kontuak osatzeko helburuarekin.
- Udalak 120.000 euro gorde ditu ekimen honetarako, herritarrek udalerria hobetzeko egiten dituzten eskaerei erantzuteko. Aurten adineko pertsonengan jarri nahi da arreta berezia.
- Proposamenak aurrez aurre aurkeztu ahal izango dira Herritarrentzako Arreta Zerbitzuan (Gertuan) edo Kultur Birikan, horretarako eskuragarri dauden inprimakiak erabiliz. Gainera, online ere parte hartu ahal izango da, parte hartzeko inprimakia udal webgunean betez www.derio.eus edo inprimakia deskargatuz eta partaidetza@derio.eus helbide elektronikora bidaliz.
Aurreko edizioekin alderatuta aurrerapen txiki batekin, Derioko Udalak aurrekontu parte-hartzaileen prozesu berri bat jarriko du abian ekainaren 3an, astelehenean, bizilagunen lankidetzari eta inplikazioari esker udalerria eraldatzen jarraitzeko helburuarekin. Egutegiak azken edizioetako egiturari eusten dio, baina herritarren bozketa epea 5 egunetik 14ra luzatuko da, inor ez dadin bere iritzia emateko gogoz geratu eta prozesuak ahalik eta parte-hartze handiena izan dezan.
Udalak ekainaren 3tik 28ra jasoko ditu derioztarrek 2025eko udal kontuetan sartu nahi dituzten proposamenak. Horretarako, udal gobernuak 120.000 euro gorde ditu, herritarrek udalerriko bizi-kalitatea hobetzeko planteatzen dituzten premiei erantzun eta horiek gauzatzeko. 2024an haurren parte-hartzea sustatu nahi izan bazen, oraingo honetan adineko pertsonengan ipiniko da arreta, hauen parte hartzea bultzatuz eta biztanleriaren segmentu garrantzitsu honetara adi dauden proiektuak sustatuz.
“Derio elkarrekin eraikitzen jarraitu nahi dugu. Gero eta gehiago dira azken urteotan errealitate bihurtu ditugun herri-ekimenak, eta filosofia horrekin jarraitu nahi dugu, konpromiso kolektiboaren filosofiarekin. Hori dela eta, parte hartzeko deia luzatzen diegu herritarrei, euren ideiak helaraz diezazkiguten, Derio guztion artean udalerri hobeago bat izan dadin”, adierazi du Esther Apraiz alkateak.
PARTE-HARTZE FASEAK
Derion erroldatutako 7 urtetik gorako edonork parte hartu ahal izango du prozesuan. Aurreko urteetan bezala, prozesuak hainbat fase izango ditu. Lehenengoa, ekainaren 3tik 28ra bitartean gauzatuko da eta herritarren proposamenen bilketa izango da. Proposamen horiek aurrez aurre entregatu ahal izango dira Gertuan Herritarrentzako Arreta Zerbitzuan edo Kultur Birikan, horretarako eskuragarri dauden inprimakiak erabiliz. Gainera, online ere parte hartu ahal izango da, parte hartzeko inprimakia udalaren webgunean betez, www.derio.eus, edo inprimaki hori deskargatuz eta helbide elektroniko honetara bidaliz: partaidetza@derio.eus
Bigarren fasean, uztailaren 1etik irailaren 5era bitartean, teknikoki aztertuko da proposamenen bideragarritasuna, eta honako premisa hauek bete beharko dituzte:
Gure udalerrian hobekuntzak ekarriko dituzten, herritarren bizi-kalitatea hobetuko duten eta udal zerbitzuak hobetu ditzaketen proposamen garrantzitsuak eta interes orokorrekoak.
Udalaren edozein jarduera-eremutako ideiak eta proiektuak. Gogoan izan ekonomikoki bideragarriak izan behar dutela, eta jasangarriak bere mantentzean eta ustiaketan.
Irailaren 9an, bideragarriak diren proiektuen zerrenda argitaratuko da udaleko iragarki-oholean eta udalaren webgunean: www.derio.eus Irailaren 16tik 30era bitartean, azterketa-prozesuaren ondoren bideragarriak izan diren proiektuak edo proposamenak bozkatu ahal izango dira. Aldi hori aurrekoetan baino zabalagoa da, inor ez dadin bere iritzia emateko gogoz geratu eta prozesuak ahalik eta parte-hartze handiena metatu dezan. Bozketa hau inkesta bidez egingo da, udalaren webgunean (www.derio.eus). Gainera, parte hartu nahi duten baina beharrezko ezagutza edo baliabiderik ez duten pertsonentzat, beren parte-hartzea errazteko, Udalak haien esku jarriko ditu Gertuan Herritarrentzako Arreta Bulegoko eta Kultur Birikako langileak.
Urriaren 15an argitaratuko dira bozketaren emaitzak, bai udalaren webgunean, bai udaleko iragarki-oholean.
Udalak herritarrak animatu nahi ditu parte-hartze handia egon dadin, guztion udal aurrekontuak lortzeko. Iaz 400 inguru izan ziren prozesuan parte hartu zuten derioztarrak, eta guztira aurkeztutako 137 proiektuetatik hautatutako lau proiektuen artean aukeratu zuten. Estalitako kantxen alboko itxiera izan zen bozkatuena, baina beste hiru proiektuek babes handia jaso zuten, eta Udalak, horretaz jabeturik, beste hirurak aurrera eramateko bideak lantzen jarraitu du.
