Derioko albuma sortu nahi dugu, ñabarduraz beteriko albuma. Handiak eta ikusgarriak diren elementuez gain, gustuko ditugun txokoak, pertsonak, angelu berriak eta detaile txikiak ere jaso nahi ditugu. Denon Derio islatu nahi dugu eta horregatik nahi dugu zure argazkiak ere bilduma honetan egotea.
Gainera, oraingo Derio eta lehengo Derio ere jasotzen duen albuma nahi dugu. Aspaldiko argazki politak badituzu, ekarri udaletxera eta kopia bat egingo dugu.
Denon irudiak herritar guztien eskura jarriko ditugu eta horretarako hiru lekutan ikusi ahalko dira:
- ONLINE: Bilduma osoa sortu berri den “Derio iruditan” Flickr kontuan ikusi ahalko da
- KULTUR BIRIKAN: Adituen laguntzarekin egindako hautaketa bat Kultur Birikako erakustaretoan ikusi ahalko da, tamaina handiagoan inprimatuta, gainera.
- 2025eko EGUTEGIAN: Udalak urtero egin eta banatzen du egutegi berezi bat, eta aurtengoa jasotako argazkien artean hautatutako 12 irudirekin osatuko da.
Bidali zure argazkiak eta erakutsi bizilagun guztiei nolakoa den zure Derio!
Denon irudiekin osatzen dugu Derio!