Derioko bizilagunek bozkatu dute eta Udalak kanpoko kirol instalazioak hobetzeko erabiliko ditu 2025eko aurrekontu parte-hartzaileetara bideratutako 120.000 euroak.
Aurtengo aurrekontu parte-hartzaileen prozesua urriaren 15ean amaitu da, proposamen irabazlea jakinarazita. Aire zabalean kirola egiteko baliabideen hobekuntzak 996 puntu lortu ditu, 925 kultur programazioa zabaltzeak eta 878 haur-parke bat estaltzeak. Derion erroldatutako eta 7 urtetik gorako 150 pertsona inguruk gauzatu dute botoa emateko eskubidea, udalerriko bizilagunek ohitura osasungarriak sustatzeko eta espazio irekiez gozatzeko duten konpromiso sendoa erakutsiz.
Udala dagoeneko lanean ari da proiektu irabazlea garatzeko. Datozen asteetan, hainbat azterlan egingo dira, esku hartuko diren arloak eta egingo diren hobekuntzen xehetasunak zehazteko. Kanpoko kirol-kantxak zein kalistenia, pump track edo skate park-eko guneak handitzea izan dira ekainaren 3tik 28ra bitartean egin zen prozesuaren lehen fasean jaso ziren iradokizunetako batzuk.
Herritarrek egindako jatorrizko 98 proposamenetatik eta azterketa sakon baten ondoren hautatutako hiru proiektuetatik, irabazlea aukeratzeko bozketak irailaren 16tik 30era bitartean egin dira. Aldi honetan 150 pertsona inguruk eman dute botoa, guztiak Derion erroldatutak eta zazpi urtetik gorakoak. Adin-taldeka, honako hau izan da bozketan parte hartu dutenen kopurua:
| Adina | Pertsona kopurua | Portzentaia |
| <18 | 11 | 7,5% |
| 18-30 | 28 | 19% |
| 31-50 | 85 | 59% |
| 51-65 | 16 | 11% |
| <65 | 3 | 2% |
Beste bi proiektuek ere babes handia jaso dute. Udala, herritarren harrera on horri erantzunez, ahal den neurrian, horiek aurrera eramateko bideak aurkitzen saiatuko da. Era berean, eskerrak eman nahi dizkie derioztarrei udalerriko bizi-kalitatea hobetzeko prozesu honetan parte hartzeagatik, herritarren kezka eta nahietatik zuzenean sortzen diren proposamenen bidez.
“Eskerrak eman nahi dizkiet Derioko herritar guztiei, beren parte hartzeko konpromisoagatik eta beren aletxoa jartzegatik. Elkarrekin eraikitzen ari garen udalerria gero eta inklusiboagoa da, eta herritarren benetako premiekin bat dator. Lanean jarraituko dugu derioztar bakoitzaren ahotsak gure erabakien motorra izaten jarrai dezan”, adierazi du Esther Apraiz alkateak.
