- ELA sindikatuak ekainaren 8tik 30era deitutako grebaren arrazoiak, esklusiboki langile eta enpresaren artean sortutako barne desadostasunetan oinarritzen dira.
- Nahiz eta Udalak ez duen inolako eskumenik enpresaren eta langileen arteko lan-harremanean, hurbilketa bat egoteko lanean dabil, bi aldeak akordio batera irits daitezen eta, horrela, kiroldegia eta estali gabeko igerilekuak ekainean itxi ez daitezen.
Enpresaren eta langileen artean akordiorik lortu ez dutenez, ELA sindikatuak ekainaren 8tik 30era greba egiten jarraitzea erabaki du Derioko Udal Kiroldegian eta estali gabeko udako igerilekuetan. Deialdi hori idatziz jakinarazi zitzaien Derioko Udaleko arduradun politiko eta teknikoei joan den maiatzaren 28an, eta modu presentzialean, pasa den ekainaren 4an, hiru alderdiek egindako barne bileran baten: enpresak (Ebone Servicios), ELA sindikatuak eta Udalak.
Patronalak eta sindikatuek (UGT, LAB eta CCOO) probintzia mailan Bizkairako hitzarmen berri baterako aurreakordioa adostu bazuten ere, Derioko kiroldegiko langileek, ELA sindikatuak deituta, mobilizazioekin jarraitzea erabaki dute, hitzarmen propio baten bidez lanbaldintzak hobetzeko helburuari eutsiz.
Aipatzekoa da grebaren arrazoiek enpresaren eta langileen arteko barne-desadostasunei bakarrik erantzuten dietela. Egoera horren aurrean, Derioko Udala bitartekari eta erreztatzailearen papera ari da betetzen, konponbide adostu bat lortzeko helburuarekin. Esther Apraiz alkateak eta Aitor Aurrekoetxea kirol zinegotziak Ebone Servicios enpresako eta ELA sindikatuko arduradunei egoeraren inguruan duten kezka handia adierazi zieten joan den asteartean, ekainaren 4, lan-gatazka honen ondorioek derioztarrak jasotzen ari diren zerbitzuetan eragin zuzena izaten ari direlako. Gaur, osteguna, beste behin ere Udalak, Derioko Udal Kiroldegiko (DUK) teknikari arduraduna den Unai Barrenetxearen bitartez, kezka hori bera helarazi die, enpresa esleipendunak, ELA sindikatuak eta Udalak internet bidez egin duten bigarren bilera honetan.
Planteatutako gatazka alderdi guztientzat modurik onenean konpontzeko asmoz, alkateak eta kirol-zinegotziak publikoki berresten dute enpresaren eta langileen arteko bitartekari lanak egiten jarraitzeko konpromisoa, biek hala eskatzen dutenean.
“Gure nahia desadostasun hori lehenbailehen konpontzea da, bi aldeentzat egokia den irtenbide bat lortuz. Derioko Udal Kiroldegia oso zerbitzu garrantzitsua da derioztarrentzat. Nahiz eta Udalak ez duen inolako eskumenik enpresaren eta langileen arteko lan harremanean, gure esku dagoen guztia egingo dugu hurbilketa bat errazteko, bi aldeak akordio batera irits daitezen eta, horrela, kiroldegia eta estali gabeko igerilekuak ekainean itxi ez daitezen “, adierazi du Esther Apraiz alkateak.
Udalak gogorarazi du, administrazio gisa, derioztarrei ahalik eta zerbitzu publiko onena ematen jarraitzeko betebeharra duela, eta, aldi berean, udal instalazioetan modu zuzenean edo kasu honetan bezala, enpresa pribatu baten bidez lan egiten duten pertsonen eskubide guztiak bermatzen jarraituko duela adierazi du.
