- Guztira, Derioko 67 herritarrek parte hartu dute eta 98 proposamen egin dituzte ekainaren 3tik 28ra iradokizunak jasotzeko garatu zen lehenengo fasean.
- Proposamen gehienak kirol-espazioak handitzearekin eta haurparkeak estaltzearekin lotutakoak dira, baina hirigintzarekin, kulturarekin, berdeguneekin edo adinekoekin lotutako neurriak ere heldu dira.
- Irailaren 9an jakingo da zeintzuk proiektu bozkatuko diren irailaren 16tik 30era bitartean.
Aurten ere, partaidetza bidezko aurrekontuen prozesua arrakastatsua izan da. Guztira, 67 herritarrek 98 proposamen egin dituzte ekainaren 3tik 28ra bitartean iradokizunak jasotzeko egin zen lehenengo fasean. Parte-hartzaileen artean, gehienak emakumezkoak izan dira, % 62, eta gizonezkoak, % 38. Adin-tarteei dagokienez, parte-hartzea adin guztietan banatu da, baina adin ertaineko pertsonak (31 eta 50 urte bitartekoak) izan dira parte-hartze handiena izan dutenak:
- 18 urte baino gutxiago: % 2
- 18-30 urte bitartekoak: % 14
- 31-50 urte bitartekoak: % 50
- 50-70 urte bitartekoak: % 28
- 70 urte baino gehiago: % 2
“Derioztarren parte-hartzea sustatzen jarraitzen dugu. Beraien iritzia beste behin ere funtsezkoa izango da 2025eko udal kontuak osatzeko. Oso pozik gaude Derioko herritarrek egindako ahaleginagatik. Aurtengo proposamenak oso egokiak izan dira eta oso ondo azalduta iritsi dira, herritarrak prozesua barneratzen ari direnaren seinale. Politika egiteko modu honen alde egiten jarraituko dugu, kogobernantzatik eta lankidetzatik; izan ere, datuak oso positiboak dira urtez urte. Derioko parte hartzearen kultura oso errotuta dago eta horrela izaten jarraitzea nahi dugu“, azpimarratu du Esther Apraiz Derioko alkateak.
Kirol-espazioak handitzea eta haur-parkeak estaltzea, proposamen nagusienak
Jasotako iradokizunen kopuruari dagokionez, zenbatekoa 98 proposamenetara iristen da. Aurkeztutako proposamen horien gaiak askotarikoak izan dira. Ugarienak kirolarekin lotutakoak (29) eta haur-parkeak estaltzearekin lotutakoak (23) izan dira. Eskaera nagusien artean daude kiroldegiko instalazioak handitzea eta hobetzea, frontoia eta kanpoko kantxak hobetzea, herrian kirola praktikatzeko espazioak handitzea edo bidegorri gehiago eraikitzea.
Hala ere, jasotako iradokizunen artean nabarmentzekoak dira hirigintzarekin lotutakoak (7), hala nola hiri-altzariak hobetzea eta asfaltatze lanak. Kulturajarduerekin lotutakoak (7), hala nola jarduera gehiago programatzea, Gazte-Txiki txokoa… adinekoei zuzendutakoak (5), hala nola kolektibo horri zuzendutako jarduerak areagotzea, gizarte-laguntzako orduak gehitzea… edo berdeguneekin lotutakoak (5), Uribe Parkearen mantentzea hobetzea, zuhaitz mota gehiago landatzea edo txakurrentzako gune gehiago sortzea, bestea beste. TAO aplikatzeko edo ibilgailuentzako, autokarabanentzako eta kanper-furgonetentzako aparkaleku bat erregulatzeko eskaerak ere agertu dira. Jasotako 98 proposamenetatik zortzi ez dira udalaren eskumenekoak.
Orain, jasotako proposamenen bideragarritasuna aztertu eta udalaren eskumenen barne dauden edo ez eta teknikoki eta ekonomikoki posibleak diren ikusi ostean, fase berri baten sartzen gara. Hala, irailaren 9an bozkatu beharreko proiektuen zerrenda udaletxeko iragarki-taulan eta Udalaren webgunean argitaratuko da.
Hirugarren eta azken fasea irailaren 16tik 30era aktibatuko da. Epe horretan, bideragarri suertatu diren proiektuak bozkatu ahal izango dira inkesta baten bidez, udalaren webgunean. Beharrezko ezagutza edo baliabiderik ez duten pertsonek Gertuan Herritarrentzako Arreta Zerbitzura jo ahal izango dute. Urriaren 15ean argitaratuko dira bozketaren emaitzak udal taulan eta web orrian.
